यी हुन् वर्षका उत्कृष्ट ७ अभिनेत्री

अभिनेत्री प्रियंका कार्की वर्ष २०७४ भरी नै व्यस्त रहिन् । उनले अभिनय गरेका चारवटा चलचित्र यो वर्ष प्रदर्शनमा आए ।

तीमध्ये शत्रु गते तथा छक्का पञ्जा–२ व्यवसायिक रूपमा अत्यन्त सफल रहे । फाटेको जुत्ता औसत रह्यो भने बटरफ्लाईले सामान्य व्यवसाय गर्‍यो । लिलिबिलीको भने यसै साता प्रदर्शन आएकाले व्यवसायिक पक्ष सम्पूर्ण रुपमा बाहिर आईसकेको छैन् ।

अभिनेत्री साम्राज्ञी राज्यलक्ष्मी शाह पनि यो वर्षभरि चर्चामा रहिन् । यो वर्ष उनले अभिनय गरेका तीन वटा चलचित्र प्रदर्शित भए ।

तीमध्ये ए मेरो हजुर–२ व्यवसायिक रूपमा सफल भयो । वर्षको अन्तिम साता प्रदर्शन भएको ‘तिमीसँग’ औसत रह्यो ।

अभिनेत्री केकी अधिकारीलाई चलचित्र क्षेत्रमा कम भाग्यशाली मानिन्छ । कारण उनले अभिनय गरेका चलचित्रले त्यति राम्रो व्यवसाय गर्दैनन् ।

वर्ष २०७४ मा केकीले अभिनय गरेका चार चलचित्र प्रदर्शनमा आए, तीमध्ये एउटाले मात्र व्यवसायिक सफलता हासिल गर्‍यो । चलचित्र ऐश्वर्यको उनको भूमिका सरप्राइज नै साबित भयो । घामपानी औसत रह्यो । 

बेनिशा हमाल यो वर्ष दुई भिन्न शैलीका चलचित्रमार्फत दर्शकमाझ आइन् । उनले अभिनय गरेका दुवै चलचित्र व्यवसायिक रूपमा औसत रहे पनि उनको अभिनयलाई भने दर्शकले मन पराए ।

अभिनेत्री निशा अधिकारीद्वारा निर्मित चलचित्र झ्यानाकुटीमा उनी गाउँले महिला तथा गृहिणीका रूपमा प्रस्तुत भइन् भने बायोपिक चलचित्र ब्लाइन्ड रक्समा उनले सृष्टि केसीको जीवनलाई पर्दामा उतारिन् । 

स्वस्तिमा खड्काका लागि वर्ष २०७४ सफल रह्यो । खासगरी चलचित्र दुई रुपैयाँका कारण उनी चर्चामा आइन् । उक्त चलचित्रको कुटुमा कुटु…गीत युट्युबमा ५ करोडभन्दा बढी पटक हेरियो ।

दसैंअघि नै प्रदर्शित चलचित्र छक्कापञ्जा–२ मा पनि स्वस्तिमा सशक्त भूमिकामा प्रस्तुत भइन् । यो चलचित्रलाई पनि दर्शकले राम्रो साथ दिए ।

पहिलो चलचित्रबाटै स्थापित हुने अभिनेत्रीको सूचीमा दीपिका प्रसाईंको नाम पनि आउँछ । यो वर्ष उनले अभिनय गरेको चलचित्र ‘ऐश्वर्य’ प्रदर्शन भयो ।

दिवाकर भट्टराईद्वारा निर्देशित रमेश उप्रेतीको उक्त चलचित्रले व्यवसायिक सफलता त हासिल गर्‍यो नै, दीपिकाको अभिनयले दर्शकको मनसमेत जित्यो । यद्यपि अध्ययनमा व्यस्त भएकाले उनले दोस्रो चलचित्र हातमा लिइसकेकी छैनन् ।

मोडलका रूपमा स्थापित अदिति बुढाथोकीले यही वर्ष अभिनयमा पदार्पण गरिन् । उनले अभिनय गरेको पहिलो चलचित्र ‘कृ’ व्यवसायिक रूपमा सफल भयो ।

दर्शकले अदितिलाई अभिनेता अनमोल केसीको जोडीका रूपमा मन पराए । बलिउडका चलचित्र उद्योगमा समेत संघर्ष गरिरहेकी अदितिले यसबीच एउटा दक्षिण भारतीय चलचित्रमा अनुबन्धित भएको जानकारी दिएकी छिन् ।